Biografia minima de on milanes (anca se on po arios)
Milanes perché sont nassuu a Milan nel 1940, on mes prima che s’ciopass la guèrra (ma l’è minga stada colpa mia!); arios perché i mè parent hinn nò de Milan: la mia mamma la vegniva dal Varesott, el mè pà dal Modenes. Ma sont anca milanes perché gh’hoo semper vivuu in ’sta grand città, la Bovisa, el Sempion, Porta Romana, Porta Magenta; dai cà de ringhera a quei vegnuu su in di ann ’50. La scola e i gioeugh in strada, e i bottegh di mè parent, bar e drogheria, dove gh’hoo imparàa el nòster dialett. Ragionatt, gh’hoo subit lavoràa in di supermercaa, la novità de allora, dove gh’hoo fàa on po de carriera, e tra on post e l’alter ghe sont stàa per pussée de 40 ann. Nel frattemp sont diventàa on po pussée milanes quand gh’hoo sposàa Lucia Cattaneo, nassuda in via Cerva, lé sì milanesa al cent per cent, e hinn rivàa fioeu e nevod. Tucc m’hann dàa di bei soddisfazion. Dal Dòmila sont in pension, ma gh’hoo mai dismettuu de fa quaicoss: iuttà a fà di ricerc sora el mè vecc mestee, dedicamm ai mè raccolt sora la storia de Milan, particolarment almanacc e calendariett del barbee, sui quai gh’hoo anca scrivuu on liber; e poeu el volontariàa, che l’è lù che l’ha dàa pussée a mì che minga mì a lù, particolarment quell per el Touring Club, grazie al qual poden vess tegnii avert tanti bei post che a mì come a la gent che vegn a visitai ghe fann cognoss tanti ròbb de Milan (ma anca in alter città), e che finissen mai de fagh dervì i oeucc, e anca la ment, sora tanta art e storia che savemm mai assée de avè.